Meta wieħed idur u jgħarrex madwar il-gżejjer tagħna, apparti t-tempji l-kbar, insibu wkoll numru kbir ta’ kappelli u knejjes żgħar imxerdin ma’ Malta kollha. Wieħed isib dawn il-kappelli kemm fiċ-ċentri kif ukoll fit-truf tal-irħula, fil-kampanja, u wkoll fl-inqas postijiet li tistenniehom bħal f’widien, għoljiet, f’għerien li mhux faċli tilħaqhom u saħansitra f’xifer l-irdum.

L-għan ta’ dan is-sit huwa li jagħti informazzjoni u jżid l-apprezzament ta’ dawn il-kappelli u knejjes żgħar. Sa ftit snin ilu konna naraw ħafna kappelli u knejjes tal-kampanja mitluqin, kważi waslu biex jaqgħu. Illum hawn moviment sħiħ ta’ restawr ta’ ħafna minnhom. Wieħed jieħu gost  jara kappelli li wara li ġew restawrati, reġgħu ġew fl-istat oriġinali tagħhom. F’dan is-sit issibu informazzjoni fuqhom, xi leġġendi ħelwin li nsibu marbutin magħhom, kif ukoll ritratti li juru l-ġmiel, fis-sempliċità tagħhom.

Iżda mhux biss.  Qed ninkludu wkoll kitbiet minn awturi Maltin esperti fis-suġġett kif ukoll l-awdjo tal-programm tar-Radju “Mat-Tokki ta’ Qniepen Żgħar”, li kien ixxandar b’suċċess fuq l-istazzjon tar-radju Radju Marija.  Ħsibna wkoll f’artikli u intervisti dwar passatempi marbuta mal-kappelli kif ukoll qed nagħtu xi listi ukoll marbutin mas-suġġett.  Billi t-teknoloġija qed tavvanza, ma setax jonqos li nużaw ukoll il-medium tal-videos li qed intellgħuhom fuq YouTube fuq ic-channel tagħna u nuruhom fil-paġni diveri biex nillustraw aħjar dak li nkunu qed ngħidu.

Qiegħdin nimxu maż-żmien iżda l-faxxinu tas-suġġett li hu l-kappelli jibqa’ l-istess anżi nittamaw ukoll li jiżdied aktar ma nimxu ‘l quddiem.

Id-Direzzjoni.

PO Box 17,
Qormi QRM 1000, ,Malta
hbieb@kappellimaltin.com

Għal aktar tagħrif, ikteb lis-Sur Louis Fenech fuq gigifen@gmail.com