Is-Sur Tony Bonello tana din l-informazzjoni
Din il-kappella hija kappella ta' ċimiterju. F'dan iċ-ċimiterju mitluq, sa fejn nista' niftakar, nismagħhom jgħidu, li kienu jidfnu lil-dawk li kienu jmutu bil-marda qerrieda tat-tuberkolożi kif ukoll dawk li mietu b'mard infettiv ieħor. Dawn kienu jkunu mill-isptar magħruf bħala l-'Inkurabbli' li l-poplu nġenerali kien idawwarha għall-'Kurabbli' li ma kien xejn ghajr l-Isptar ta' Santu Spirtu - illum is-sit tal-Arkivji Nazzjonali.
L-isptar l-ieħor tal-mard infettiv kien l-Isptar Connaught (li ġie magħluq fl-1956), illum il-Mużew tal-Istorja Naturali sewwasew kif tidħol l-Imdina. Missieri, li m'ilux wisq mejjet u kieku kien jagħalaq 100 sena fi ftit xhur oħra, kien jgħid illi xi Nanniet tieghu kienu midfuna hemm għax kienu mietu bit-Tuberkolożi, u billi aħna minn Ħad-Dingli, kull darba li konna ngħaddu bil-karozza fi triqitna lejn San Pawl il-Baħar konna ngħidu talba żgħira ghall-ruħhom. Dejjem niftakar u anke sa ftit ilu, xi ħadd kien jixgħel xi xemgħa u jdendilha mal-bieb tal-ħadid fuq barra.
Dan iċ-ċimiterju wieħed jista' jarah tajjeb ħafna minn fuq is-swar tal-Imdina u wieħed għandu jinnota li ħdejh hemm ċimiterju ieħor iżgħar ta' forma trijangolari. Qegħdin ħdejn xulxin b'miġra ta' Wied il-Ħemsija għaddeja bejniethom u eżatt ma' ġenb iċ-ċimiterju ż-żgħir. Dan ma jidhirlix li għandu kappella, imma tant hemm ħaxix ħażin li anqas biss tista' tidħol ġewwa u l-uniku mezz kif tara huwa li tarah mill-Imdina.
Kumbinazzjoni xi ġimgħatejn ilu mort ħadt xi ritratti fl-inħawi għax innotajt illi kien hemm xi xogħol għaddej f'dan iċ-ċimiterju tal-kappella. Sibt illi kienu qatgħu u naddfu il-post mill-ħaxix salvaġġ li kien kiber qies ta' siġar. Il-ħajt tal-lemin, li jifred iċ-ċimiterju mill-għalqa ta' ħdejh huwa mwaqqa' u sar ġbir ta' dan il-ġebel li qiegħed f'bruġ fit-tarf taċ-ċimiterju. Riċentement, xi ħadd poġġa xi qsari friski mqassmin mal-passaġġ tan-nofs li jwassal ghall-kappella.
F'dan iċ-ċimiterju ma jidhrux lapidi u għalkemm imqassam f'sezzjonijiet, m'hemm l-ebda marki. Ix-xogħol jidher li waqaf. Ħasra jekk jibqa' mitluq u miftuħ għax dan għandu jkun post sagru fejn hemm l-antenati tagħna.
|
