Restawr tal-Kappella ddedikata ‘l Sant’Antnin ta’ Padova fil-Forti Manoel

Il-kappella Barokka ddedikata lil Sant’Antnin ta’ Padova li tinsab fil-Forti Manoel qed tiġi restawrata għal kif kienet taħt is-superviżjoni tal-periti Alex Torpiano u Konrad Buhagiar. Għal aktar dettalji araw hawn: http://www.timesofmalta.com/articles/view/20090714/local/meticulous-work-to-restore-fort-manoel-baroque-chapel
Nota: Id-Direzzjoni mhix responsabbli għal dak li jkun miktub f’siti esterni għal www.kappellimaltin.com u lanqas ma jfisser li taqbel jew tieħu xi pożizzjoni favur jew kontra l-kummenti li jidhru taħt l-artiklu.
 

06/03/2009 Sponsorship mill-APS Bank imġedded għal sena oħra

Għat-tieni sena konsekuttiva l-Bank APS għoġbu li jaċċetta li jorbot ismu mas-sit tagħna billi jagħtina għajnuna sabiex inkopru spejjes marbutin max-xiri u t-tħaddim ta’ dan is-sit. Ta’ dan nirringrazzjawhom minn qalbna. 
 

04/01/09 Servizz qasir aħbarijiet tal-PBS dwar is-sit www.kappellimaltin.com

Roderick Busuttil ħa sehem f’intervista għall-aħbarjiet tal-PBS, liema servizz għad irid jixxandar aktar tard. Is-servizz sar fl-isfond tal-kappella tal-Viżitazzjoni ta’ Wied Qirda f’Ħaż-Żebbuġ. Roderick Busuttil tkellem primarjament fuq il-website tagħna iżda kif kienu hemm, ix-xandara tal-PBS għoġbithom ferm il-knisja ta’ Wied Qirda u ġibdu filmat estensiv tagħha. Roderick Busuttil għażel li jagħti din l-intervista hawn propju għal dan l-iskop u sabiex iqajjem aktar interess f’din il-kappella li qegħda fi stat t'abbandun. Ħajr lil Mario Micallef u Keith Demicoli.
 

03/01/09 Artiklu dwar is-sit tagħna fil-ġurnal ta’ Kuljum In-Nazzjon

Artiklu tas-Sur Joe Chetcuti fuq il-website tagħna fil-ġurnal ta’ kuljum In-Nazzjon f’paġna 13.
 

29/12/2008 Kappella fi stat ħażin

Kitba ta’ Annaliza Borg fil-gazzetta The Malta Independent tad-29 ta’ Diċembru tal-2008 dwar il-Kappella ta’ San Pietru f’Baħar iċ-Ċagħaq.
http://www.independent.com.mt/news.asp?newsitemid=80749
 

30/11/08 Heritage Trail madwar Kappelli Medjevali

Heritage Malta ser torganizza ħarġa edukattiva fis-sensiela Heritage Trail nhar il-Ħadd, 7 ta’ Diċembru 2008. Din id-darba il-ħarġa ser iddur madwar kappelli medjevali, fosthom il-Kappella ta’ Santa Marija ta’ Bir Miftuħ fil-Gudja, dawk tal-Lunzjata u ta’ San Ġwann Evanġelista f’Ħal Millieri kif ukoll il-fdal arkejoloġiku f’tas-Silġ. Il-ħarġa titlaq fid-08:45 minn ħdejn il-Hotel Phoenicia. Għal aktar informazzjoni u biex tagħmel booking, ċempel lill-Heritage Malta fuq 22954312.  Il-ħlas hu ta’ €15.
 

30/11/08 Ħerba fil-palazz u l-kappella “Tal-Barunessa”

Ħerba fil-palazz u l-kappella “Tal-Barunessa” fi Triq San Anard, bejn ix-Xgħajra u Wied il-Għajn. Artiklu ta’ Victor Vella fl-Orizzont ta’ nhar l-Erbgħa 19 ta' Novembru 2008. Aqraw dwar l-istat li tinsab fih din il-kappella u araw ukoll xi ritratti.
http://www.l-orizzont.com/news.asp?newsitemid=47816
 

Serq ta’ Qanpiena mill-Kappella tal-Fawwara -
Il-Ġens, ħarġa tat-8 ta’ Novembru, 2008

Fil-ġranet li għaddew għebet il-qanpiena tal-Knisja tal-Karmnu, fil-Fawwara, limiti tas-Siġġiewi. Dawk li wettqu dan l-att, barra l-qanpiena, ħadu wkoll it-travu li kien iżommha, barra li għamlu wkoll xi ħsara lill-pilastri.

Din il-kappella storika nbniet fl-1616 min-Nobbli Ġiroloma Ciantar, li ħasbet ukoll biex toħloq Rettorat u ħalliet ukoll xi għelieqi biex mid-dħul tagħhom tinżamm il-kappella u tingħata kura pastorali lill-bdiewa li jaħdmu l-art agrikola fdik iż-żona. Hu minħabba dan il-fatt storiku li ż-żona llum tissejjaħ 'Ġebel Ciantar'.

Il-kappella kienet restawrata minn grupp ta' saċerdoti xi żmien ilu, u llum isservi biex jiltaqgħu fiha regolarment biex ikomplu bil-formazzjoni permanenti tagħhom.

Nhar it-Tnejn xi wħud minn dawn is-saċerdoti li marru l-Fawwara, bħalma jagħmlu kull ġimgħa, indunaw li l-qanpiena kienet nieqsa. Għaldaqstant sar rapport lill-pulizija, li min-naħa tagħha qed tinvestiga l-każ. Il-Maġistrat Doreen Clark qed tmexxi l-investigazzjoni. Dawk li jkollhom xi tagħrif dwar din il-qanpiena, huma mitluba jċemplu l-Kurja ta' l-Arċisqof.
 

10-08-2008: Restawr

Bi pjaċir inħabbrulkom li wara li dehret il-paġna fuq is-sit tagħna dwar il-kappella ta’ San Pietru f’Ħal Qormi, bħalissa qed isir xogħol ta' restawr fil-kappella u fi ftit jiem oħra tkun lesta. Dan ix-xogħol daħlu għalieħ il-membri tal-Fratellanza tas-S.S. Sagrament immexxijin mis-Sur George Sciberras li huwa ir-rettur ta' din il-fratellanza. Il-fratelli ħassew il-bżonn ta' dan ir-restawr għax din il-kappella tant saret popolari man-nies ta' Ħal Qormi għall-Adorazzjoni Perpetwa. Meta jkollna r-ritratti tar-restawr, intellgħuhom sabiex taraw ix-xogħol li jkun sar.
 

09-08-2008: Ktieb Ġdid

Is-Sur Pawlu Aquilina, mis-Siġġiewi, għadu kemm ħareġ ktieb bl-isem “L-Għanja tiegħi lil Ħal Kbir”. Dan fiħ tagħrif storiku, poeżiji, folklor u għadd ta’ ritratti, kollox relatat mal-kappella tal-Madonna tal-Providenza tas-Siġġiewi. Il-ktejjeb ġie ppublikat mill-Klabb Kotba Maltin u d-dħul minnu ser imur kollu għad-Dar tal-Providenza, fis-Siġġiewi.
 

21-07-2008

Għalaqna sena ...

Għeżież ħbieb,

Bħal lum sena ilu ġiet (21/07/2007) mnehdija għall-ewwel darba il-website www.kappellimaltin.com L-għan tagħna ta’ meta bdejna dan il-proġett kien li nippruvaw inqajmu interess fuq tant kappelli li hawn imxerda madwar pajjiżna u biex isservi bħala spalla għall-programm "Mat-Tokki ta’ Qniepen Żgħar".

F’din l-aħħar sena ħdimna ħafna. Minn xejn illum il-website tikkonsisti f’iktar minn 100 paġna. L-iktar prominenti bla dubju huma il-Kappelli fejn sal-lum tellajna 64 il-waħda, kollha bir-ritratti minn barra u minn ġewwa. Għandna wkoll sezzjonijiet oħra bħal dik tal-Artikli fejn sal-lum hemm 12–il artiklu, ħafna minnhom miktuba apposta għal din il-website. Hemm ukoll 37 intervista ma’ nies esperti fuq dan is-suġġett f’verżjoni awdjo li jistgħu jinstemgħu taħt is-sezzjoni Programm.

Irnexxilna ukoll nagħqdu u ntellgħu lista tal-kappelli li hawn f’Malta u Għawdex u għalkemm din jaf ma tinkludix il-kappelli kollha li hawn, żgur li hi viċin ħafna għax ġiet riveduta minn għadd ta' nies li huma esperti tal-kappelli. Sezzjonijiet oħra li nsibu fil-website huma dawk tal-Attivitajiet li titella' bl-għajnuna ta’ Joe Chetcuti li kull xahar jgħaddilna l-lista ta’ festi li jkunu ser isiru, dik tal-Passatempi fejn fiha nintervistaw nies li għandhom passatempi marbutin ma dan is-suġġett, is-sezzjoni Glossarju li fih hemm deskrizzjoni tat-termini li jintużaw fil-kitbiet tagħna u dik tal-Qaddisin, fejn hemm artikli fuq l-iktar qaddisin li għandhom dediki ta’ kappelli u knejjes f’pajjiżna.

Matul din is-sena ħdimna ħafna biex il-livell tas-sit ikun dak li hu llum. Il-website ġiet aġġornata iktar minn 50 darba, kważi kull ġimgħa. Aħna nagħmlu minn kollox biex l-informazzjoni li nagħtu tkun korretta u minn sorsi tajbin. Dan hu grazzi għal ħafna nies li qegħdin jgħinuna kemm dawk li għaddewlna l-artikli, dawk li tawna l-informazzjoni, min fetaħ il-kappelli biex inkunu nistgħu nieħdu r-ritratti kif ukoll dawk li sellfuna r-ritratti tagħhom biex ikunu jistgħu jintużaw fis-sit. Dawn in-nies kollha huma mniżżlin fis-sezzjoni Referenzi.

Grazzi speċjali tmur lil Anthony M. Brincat li hu kontributur regolari tas-sit speċjalment fejn jirrigwardja deskrizzjonijiet arkitettonċi tal-kappelli. Grazzi kbira tmur ukoll għal Stanley Spiteri talli qed jagħmel proof reading tas-sit.

Nixtiequ ngħidu li aħna sodisfatti ħafna għal feedback kbir li qed ikollna. 'L fuq minn 11 000 ruh żaru s-sit matul din is-sena bin-numri jiżdiedu minn xahar għal xahar. Grazzi lill-APS talli din is-sena għazel li jkun l-isponsor tal-website. Iżda l-iktar ħaġa li għamlitna kburin bis-sit kienet meta l-Arcisqof ta’ Malta Mons. Pawl Cremona għamlilna introduzzjoni tas-sit fejn għaraf ix-xogħol tagħna u sab il-ħin biex jakkreditah. Dan jimliena bil-kuraġġ biex inkomplu.

Aħna nħarsu 'l quddiem biex matul it-tieni sena tal-proġett inkomplu fejn bdejna biex nagħtu iktar informazzjoni fuq iktar kappelli u suġġetti relatati. Bl-għajnuna u support tagħkom warajna aħna sejrin inkomplu nżzommu mal-għan tagħna, dak li nagħtu tagħrif u apprezzament lil tant kappelli li bnew missierijietna.

Insellu għalik,
 
Roderick Busuttil, Joe Brincat u Noel Ciantar